Mar 8 | MHL | STEP | Aria iir oko emeria mua unowa nainiw ekapep Yeesus wiar fiirimemik. Naap ikok wi enowa weetakeya Yeesus ona teeria wia fareya ekapiwkin wia maakek,

Mark 8

Yeesus emeria mua tausen erepam maa enowa wienakek

(Matiu 15.32-39)

1 Aria iir oko emeria mua unowa nainiw ekapep Yeesus wiar fiirimemik. Naap ikok wi enowa weetakeya Yeesus ona teeria wia fareya ekapiwkin wia maakek, 2 “Teeria maneka fain wia kemaliyem. Moram yo efamiya ikemik nain aakisa fofa arow fan ikemik, ne maa enowa wiar weeserek. 3 Wi papako epasia-pa ekapemik. Yo owowa wia sesekinen-na ikiwemi wuailep mia sekurarikuan.”

4 Naeya maakemik, “Epa fain owowa marew. I enowa kamenap imenap teeria maneka fain wienakiyen?” 5 Ne wia nokarek, “Ni emer ikowa kamin niar ikua?” Ne maakemik, “Ikur okaiwi-pa erup.” 6 Naeya teeria maneka wia maakeya miiwa-pa pokamik. Ne o emer ikowa nain aawep Mua Maneka sira eliwa naakep-puap wu-wuepap sererkap ona teeria wieya wienakemik. 7 Ne mera gelemutitik nain pun wiar aawep Mua Maneka sira eliwa naakep-puap sererkap ona teeria wieya wienakemik.

8 Wi enep pepek eramik. Ne maa enowa enakiwa kiromakek nain inera-pa iparemik nain inera ikur okaiwi-pa erup taanomakek. 9 Emeria mua unow akena, tausen erepam naap. 10 Aria wia sesekeya ikiwiwkin ona teeria onaiya aasa irap Dalmanuta kame ikiwemik.

Yeesus maa miililina-ko oninok naep maakemik

(Matiu 16.1-4)

11 Aria wi Farisi teeria papako-ke ekapep Yeesus oporiw irakemi maakemik, Mua Maneka kekanowa iwinon-na maa miililina-ko oninok naep. 12 Ne Yeesus kema pinarep ewar maneka aawemi maek, “Sa, ni emeria mua moram anane mokoka afililowa muuta nain maa miililina one efa maakiman? Yo makena nia maakiyem, yo aakisa maa miililina me oninen. Weetak akena.” 13 Naap wia maakep-puap wia piipuap ona teeria onaiya aasa irami eka pona kame okaiwi ekamik.

Wi Farisi ne wi Erot teeria sira eliw marew

(Matiu 16.5-12)

14 Iir nain Yeesus ona teeria kema irinarep emer ikowa-ko me aawemik. Kuisow akena wiar ikua. 15 Ne Yeesus-ke opora anian wia kaisomak, “Ni maa urufap! Ni wi Farisi ne Erot teeria emer ikowa yis me wiar aaweka.” 16 Naap wia maakeya wi-wieniw aakunemi maemik, “Nee, i emer ikowa mareweya naap maek-yon.”

17 Wi naap muninem-ikaiwkin Yeesus kema wiar amisarep wia maakek, “Ni moram emera marewa muuta nain aakuniman. Ni kema pukow marew-i? Ni maa me urufiman-i? Ni kema korineman-i? 18 Ni mokoka niar ikua, nain maa me urufaman. Ni ifana niar ikua, nain opora me miimaman. Ni maa kema irinareman-i? 19 Iir oko-pa yo emer ikowa ikur nain sererkamkun wi mua tausen ikur enemik, ne emera kirek nain inera kamin ipareman?” Ne maakemik, “Inera ten kuisow erup iparemik.” 20 Ne nainiw wia nokarek, “Ne yo emera ikur nain sererkamkun mua tausen erepam enemik nain emera kirek nain inera kamin ipareman?” Ne maemik, “Inera ikur okaiwi-pa erup.” 21 Ne wia maakek, “Ni nain kema-ko me pukeman-i?”

Yeesus mua mokok opa saliwak

22 Aria Yeesus ona teeria onaiya ekap Betsaida owowa kereremik. Ne mua papako-ke mua mokok opa oko aawep o wiar pekapemik. Pekapemi omawami maakemik, “Mua fain tiimeya mokoka wiar sariarinok aa.”

23 Ne mua nain wapena wiar opap ikos owow erepura ekap mokoka-pa opeka tuenep mia wiar opap nokarek, “No maa-ko urufin-i?” 24 Naeya maa urufap maek, “Yo wi mua soomarimik nain wia urufiyem, nain wi nomokowa saarik.” 25 Naap maeya mokoka nainiw wiar opeya iiwawun sariarep maa baliwep urufak. 26 Ne Yeesus-ke sesekami maakek, “No nena koora ikiwe. Owowa goneiw me ikiwe.”

Pita-ke Yeesus o Krais-ke naek

(Matiu 16.13-20, Luk 9.18-21)

27 Aria Yeesus ona teeria onaiya Sisaria Filipai kame ikiwemi owow unowa nain wiar ikiwemik. Ikiwem-ikok ona teeria wia nokarek, “Wi emeria mua unowa, yo naareke efa maimik?” 28 Naeya maemik, “Wi papako-ke no Yon Baptais-ke nefa maimik. Wi papako-ke no Elaiya-ke nefa maimik, ne wi papako-ke no profet oko-ke nefa maimik.”

29 Ne nainiw wia nokarek, “Ne ni, yo naareke efa maiman?” Naeya Pita-ke maek, “No Krais-ke. Mua Maneka-ke nefa sesekak nain-ke.” 30 Naap maeya opora kekanowa wia maakek, “Yo mua nain-ke, nain me wia maakeka.”

Yeesus ona ikoka umep ikok iikirowa maek

(Matiu 16.21-28, Luk 9.22-27)

31 Aria Yeesus opor oko feenap wia maakek, “Yo Mua Muuka-ke, ikoka sirirowa maneka aawinen. Ne wi owow woos mua, wi pris woos mua, ne sira amis mua-ke yo mikikira yiikuan. Ne efa ifakimiwkin umep fofa arow-pa iikirinen,” naap maek.

32 Ne opora nain ariman akena wia maakeya Pita-ke aawep wiena wenup tenep ekap kakankak. 33 Ne Yeesus kirep ona teeria wia mokakemi Pita kakankami maakek, “Satan, no eenap eke! No opora maen nain me Mua Maneka kookalowa-ke, weetak, nain ona mua kookalowa-ke.”

34 Naap ikok wi teeria maneka ne ona teeria wia fiirimep wia maakek, “O mua yo yookekam naep-na, aria ona mia me wame kema suuwowa nomokow moke akuawep sirirowa aawemi yo yookinok. 35 O mua ona mia wame kema suuwap sirirowa me aawinon-na ikoka umep iiwawun mesenalinon. Ne mua yo muuta nain mia sirirowa sira-sira aawinon-na Mua Maneka wameiya-pa eliwa ikainon.

36 Makena, mua-ko miiw maa unowa iiwawun ona waisow ifemakep aawinon. Nain ona wame ekerap kamenap arinon? 37 Maa mauwiw eliw ikowa nain wame saliwinon? Me pepek. 38 Aakisa miiwa fain emeria mua unowiya Mua Maneka opora me miimimik ne pun sira samo-samora onimik. Ne o mua yo yookowa nain emina ururep yo opora efar mesaliminon-na, wiimar yo Mua Muuka-ke wi ensel wiamiya Auwa Mua Maneka unum maneka ne parina-pa oromi mikikira iwinen.”